जातरूपं तथा रुप्यमारकूटं च सीसकम्। ताम्र लोहं च वंग च काचं च स्वर्णमाक्षिकम् ।। मुक्तां मरकतं पद्मरागं वज्र च विद्रुमम्। खंगशृंगं चामरं च रदं स्तांबेरमं तथा। कस्तूरिकां च काश्मीरं पाटीरं हिमवालुकाम्। कालागुरू च कर्पूर कंकोलं रक्तचन्दनम् ।। एलां च देवकुसुमं त्वक्पत्रं चीनदारु च। कतर्क नक्रनखरं नलदं नागकेसरम् ।। जातीफलं मातुलानीमहिफेनं च पत्रकम्। राजादनं कंदरालं द्राक्षां खर्जूरकं तथा।। खर्बरं मरिचं पूगं देवदारु च नागरम्। ग्रन्थिकं च पलां चव्यं कांचनीमथ सैंधवम् ।। सौवर्चलं यवक्षारं सर्जिकां च हरीतकीम्। वृकधूपं सर्जरसं सिलाजतु च सिक्थकम् ।। तार्थ्यशैलं शिखिग्रीवं चक्षुष्यां यामुनं पुनः। अजमोदां च बाह्रीकं जीरके लोध्रकं तथा। गुग्गुलं पावकशिखं मंजिष्ठां नागसंभवम्। पारदं हरितालं च गंधाश्मानं मनःशिलाम् ।। लाक्षां गंधरसं चापि गोरोचनमथाभ्रकम्। तांस्तान् विषविशेषांश्च तत्तन्निर्हरणानि च ।। कौशेयान्यथ तार्णानि श्रौमाणि फलजानि च। रांकवाणि तथौर्णानि वासांस्यभिनवानि च ।। एतान्यन्यानि च तदा वस्तूनि बहुशो नृपः। महाभारसहैर्वाहैर्वामीभिर्वृषभैस्तथा।। भारयष्टिधरैश्चापि पुरुषैर्विष्टिकारिभिः। वाहयित्वात्मदुर्गेषु तेषु तेषु न्यधापयत्।।