गुरुशक्तिसुतज्येष्ठकनिष्ठान् कुलदेशिकान् । कुलदर्शनशास्त्राणि कुलद्रव्याणि कौलिकान् ॥ प्रेरकान् सूचकांश्चापि वाचकान् दर्शकांस्तथा । शिक्षकान् बोधकान् योगी योगिनीसिद्धिरूपकान् ॥ कन्यां कुमारिकां नग्नामुन्मत्तां वापि योषितम् । न निन्देन्न जुगुप्सेत न हसेन्नावमानयेत् ॥ नाप्रियं नानृतं ब्रूयात् कस्यापि कुलयोगिनः । कुरूपा चेति कृष्णेति न वदेत् कुलयोषितम् ॥